Majboor-e-ana ho kar

Majboor-e-ana ho kar,
Paband-e-wafa ho kar,
Ham beth gaye aakhir,
raazi'ba'raza ho kar,
Jis rut mein wo bichra tha,
us rut kay ta'aqub mein,
Dil hay keh bhatakta hay,
raahon ki hawa ho kar,
is jism k zindaan mein,
ik umar se qaidi hain,
Ur jayein gay ham akhir,
ik roz reha ho kar,
ab tak mere angan mein,
phoolon ka basera hay,
guzray thay meray ghar se,
wo baad-e-saba ho kar,
is darja hawadis se,
khaaif hay meri hasti,
har lafz nikalta hay,
honton se dua ho kar.