dono jahaan teri muhabbat mein haar kay, 
woh jaa raha hai koi shab-e-gham guzaar kay. 

viraan hai maikada khum-o-saaghar udaas hai, 
tum kya gaye keh ruuth gaye din bahaar kay. 

ek fursat-e-gunah mili woh bhi chaar din, 
dekhey hain hum ney hauslay parwardigaar kay. 

duniya ney teri yaad sey begaana kar diya, 
tujh sey bhi dilfareb hain gham rozgaar kay. 

bhuuley sey muskara to diye woh aaj faiz, 
mat pooch walwalay dil-e-nakarda kaar kay.