andhairon ka tasalsul mukhtasir honay nahin deta

andhairon ka tasalsul mukhtasir honay nahin deta 
sehar ka naam leta hay, sehar honay nahin deta 

woh shab fitrat hay us ko roshni achhi nahin lagti 
kisi gher main ujaalon ka guzer honay nahin deta 

woh dehshat banTta hay khauf kay manzar bhi deta hay 
koi shakh e tamanna baar'aawer honay nahin deta 

woh saaray faislay hasb e zaroorat aap kerta hay 
kisi ka harf, Harf e mu'taber honay nahin deta 

hamesha doosron main faaslay taqseem kerta hay 
woh logon ko baahem sheer o shakkar honay nahin deta 

ameer e karawaN rehnay ka itna shoq hay us ko 
keh danista bhi takmeel e safar honay nahin deta