Wednesday 17 October 2012

Ussey khabar hai merey gham hi maal hain mera



Main tera aaj hoon kal par nah dekh taal mujhey
main tera roop hoon joban men hi sanbhaal mujhey

merey hi dum sey hain teri yeh dharkanai'n zinda
main tera qalb hoon siiney sey mat nikaal mujhey

main terey bakht ka sikka hoon yeh khayaal rahey
yun hi faqeer ki jholi men tu nah daal mujhey

milain gay mujh men muhabat k goher tujh ko
main teri chaah ka saagar hoon kuch khangaal mujhey

tu dharkano'n ko churaney k fun sey waqif hai
tu dil ka chor hai itna nah tha khayaal mujhey

ussey khabar hai merey gham hi maal hain mera
naye gham sey woh rakhta hai maala maal mujhey

main jin ko ley gaya bam-e-arooj par
woh muntazir hain keh kab aaye ga zawal mujhey

No comments:

Related Posts Plugin for WordPress, Blogger...
Blogger Wordpress Gadgets