Bohat dinon baad

Bohat dinon baad

Teray khat k udass lafzon ney

Teri chaahat k zaaiqon ki tamaam khushboo

Meri ragon men undail di hai

Bohat dinon baad teri baatain

teri mulaqat sey dehekti raatain

Ujaarr aankhon ki pyas pataal ki tehon men

Wasaal waadon ki chan'd chingariyon ko saans ki aanch dey ker

Teray mehaktay maheen lafzon ki aabsharain

Bohat dinon baad phir sey

Mujh ko rula gaii hain

Bohat dinon baad main ney socha to yaad aaya

Keh meray ander ki raakh k dhair per abhi tak

Teray zamanay likhay huay hain

Bohat dinon baad main ney socha to yaad aaya

Keh main bhi kitna bad'al gaya hoon

Bichar k tujh sey

Kaee lakeeron men dhal gaya hoon

Main apnay cigarette k be irada dhuai’n ki soorat

Hawa men tehleel ho gaya hoon

Na dhoond meri wafa k naqsh – e – qadam k raizay

Keh main to teri talash k be kinar sehra men

Najanay kis raah men kho gaya hoon....