Judai dainey waaley tum sey umeed-e-wafa kaisi

Judai dainey waaley tum sey umeed-e-wafa kaisi

ta’aluq toot jaaye jab

muhabbat rooth jaaye jab

to phir rasm-e-dua kaisi

milan ki ilteja kaisi

bhanwar men dolti kashtii pey saahil ki tamanna kaya

ukharrtay saans hon to zindagi ki aarzoo bhi kaya

jo manzil kho chuki ho uss ki phir sey justuju bhi kyun

magar dil ney tumhein kis waastay sey yaad rakha hai

tumhein kyun shayari men aaj takk aabaad rakha hai

abhi tak main ney kyun khud ko bohat barbaad rakha hai

hawa k dosh per kyun naghma-e-faryaad rakha hai

judaii dainey waaley aashnaii ki qasam tum ko

tumhari bewafai, kaj-adaai ki qasam tum ko

mujhey itna bata dena

wafa ki chaahaton ki mash’alein kaisey bhujatey hain

nishaan kaisey mitaatey hain

bhulana ho jinhein unn ko bhala kaisey bhulatay hain