میں جس سفر میں ہوں

میں جس سفر میں ہوں
اُس سفرمیں تمہیں ہمسفر
بنا سکتا نہیں
مرے قدم ایسے راستوں میں گُم ہیں
کہ میں خود اپنی منزل کا پتا
بتا سکتا نہیں
لیکن مجھے معلوم ہے
مجھے لوٹ کر ہی آنا ہے
تو پھر یہ التجا ہے میری تم سے
جب کبھی میں گرد آلود جسم کے ساتھ


اپنی روح کو
نامُرادیوں اور مایوسیوں کے پتھروں پر
گھسیٹا ہوا
واپس تمہارے پاس آؤں اگر
بس تم اتنا کرنا
میرے جُھلسے ہوئے وجود کو
اپنے آنسوؤں سے تر کردینا
اور ہاتھ پکڑ کر میرا
پھر سے وہیں کھڑا کردینا
جہاں سے میں نے پہلے
سفر شروع کیا تھا
مگر اُس بار یہ ضرور کرنا
میرے ہاتھ میں دیا
اپنی شام کا رکھنا
بس اتنی التجا ہے میری
میری منزل کا پتہ
اس بار
اپنے نام کا رکھنا