Wednesday, 28 August 2013

paas jab tak wo rahay dard thama rehta hai


phir meray shehr sey guzra hai wo badal ki tarah
dast e gul phaila huwa hai meray aanchal ki tarah

keh raha hai kisi mausam ki kahani abb tak
jism barsaat mai bheegay huway jangal ki tarah

oonchi aawaz mai us nay tau kabhi baat na ki
khafgiyo'n mai bhi wo lehja raha komal ki tarah

mil k uss shakhs sey main laakh khamoshi say chaloo'n
bol utth'tee hai nazar paao'n ki chhagal ki tarah

paas jab tak wo rahay dard thama rehta hai
phailta rehta hai phir aankh k kaajal ki tarah

abb kisi taur sey ghar janay ki soorat hi nahee'n
raastay merey liye ho gaye daldal ki tarah

jism kay teeraa o aasaib zada mandar mai
dil sar e shaam sulag utth'ta hai sandal ki tarah

Post a Comment
Related Posts Plugin for WordPress, Blogger...
Blogger Wordpress Gadgets