Tuesday, 10 September 2013

Main to samjha tha bhar chukey sab zakhm


awal awal ki dosti hai abhi
aik ghazal hai keh ho rahi hai abhi

main bhi shehr-e-wafa mai nowarid
woh bhi ruk ruk k chal rahi hai abhi

main bhi aisa kahan ka zod-o-shanas
woh bhi lagta hai sochti hai abhi

dil ki waaruftagi hai apni jagah
phir bhi kuch ehtiyat si hai abhi

gar chey pehla sa ijtinab nahi
phir bhi kam kam supurdigi hai abhi

kaisa mausam hai kuch nahi khilta
boonda baandi bhi dhoop bhi hai abhi

khud kalami main kab yeh nasha tha
jis tarha roobaru koi hai abhi

qurbaten laakh khuubsoorat hon
dooriyon mai bhi dilkashi hai abhi

fasl-e-gul mai bahar pehla gulab
kis ki zulfon main tankti hai abhi

raat kis mahwish ki chahat mai
shabistaan saja rahi hai abhi

main kisi wadi e khayal mai tha
baraf si dil pey gir rahi hai abhi

main to samjha tha bhar chukey sab zakhm
daagh shayad koi koi hai abhi

duur daison sey kaaley koson sey
koi awaz aa rahi hai abhi

zindagi kue na muradi hai
kis ko murr murr ke dekhti hai abhi

is qadar khich gai hai jaan ki kamaan
aisa lagta hai toot'ti hai abhi

aisa lagat hai khilwat-e-jaan mai
woh jo ik shakhs tha wohi hai abhi

muddaten ho gaeen Faraz magar....?
woh jo deewangi si thi hai abhi

Post a Comment
Related Posts Plugin for WordPress, Blogger...
Blogger Wordpress Gadgets