Chaahhat Ka Rung Tha Na Wafa Ki Lakeer Thii

 Chaahhat Ka Rung Tha Na Wafa Ki Lakeer Thii
Qaatil Ke Haath Main To Hina Ki Lakeer thii


Khush Hoon Ke Waqt-e-Qatal Mera rung Surkh Tha
Merey Labon Pe To Harf-e-Dua Ki Lakeer Thii


Main Karwaan Ki Rah Samajhta Raha Jisse
Sehra Ki Reit Pe Woh Hawa Ki Lakeer Thii


Sooraj Ko Jis Ne Shab Ke Andheiron Main Gum Kia
Mouj-e-Shafaq Na Thii Woh Qaza Ki Lakeer Thii


Guzra Hai Shab Ko Dasht Se Shaid Woh Pardah Daar
Her Naqsh-e-Pa Ke Saath Rida Ki Lakeer Thii


Kal Uss Ka Khat Mila Keh Saheefa Wafa Ka Tha
Mohsin Her Ek Satar Haya Ki Lakeer Thii