Hamare dil main chupe hoye dard ki khabar chasham-e-ter ko ho gi

Meri mohabbat to ik goher hai,teri wafa be-karan samandar
Tu phir bhi mujh se azeem ter hai,kahan goher hai,kahan samandar


Yaqeen hai dhoke main aa k utra hai chaand paani ki saltnat main
Bulandi’on se dikhai deta hai hu-baa-hu aasman samandar


Azal se be-simt justuju ka safar hai derpesh paani’on ko
Kisey khabar kis ko dhoondta hai meri tarha raigaan samandar


Main tishna lab door se jo dekhoon to her taraf sail-e-aab paauun
Qreeb jaaon to rait sholaa,ghubaar sahil,dhuwan samandar


Hamare dil main chupe hoye dard ki khabar chasham-e-ter ko ho gi
Suna hai zer-e-zameen khazanon ka hai faqat raazdan samandar


Main ista’aron ki sarzameen pe uter k dekhoon to bhaid paauun
Bashar musafir,hayat sehra,yaqeen sahil,gumaan samandar


Jahan jahan sham-e-gham ki afsurdagi ka matam bapa howa hai
Ufaq se aa k gale mila hai wahan wahan mehrbaan samandar


Wafa ki basti main rehne waalon se hum ne”Mohsin”ye taur seekha
Labon pe sehra ki tishnagi ho magar dilon main nihan samandar