Aa keh vaabasta hain us husn ki yaadeN tujh sey

                                                              

Aa keh vaabasta hain us husn ki yaadeN tujh sey
jis ney is dil ko pariiKhaana banaa rakhaa thaa
jiski ulfat meN bhula rakhii thii duniaa hamne
dehar ko dehar ka afsaana banaa rakhaa thaa

aashnaa haiN tere qadmoN sey voh raaheN jin par
uskii mad’hosh javaani ney inaayat kii hai
karvaaN guzrey haiN jin sey isii ra’anaaii key
jiskii in aankhoN ney be-suud ibaadat kii hai

tujh sey khelii haiN voh mahbuub havaayeN jin meN
us key malbuus kii afsurda mehak baaqii hai
tujh pey bhii barsaa hai us baam sey mehtaab ka nuur
jis meN biitii hu’ii raatoN ki kasak baaqii hai

tuu ney dekhii hai voh peshaani, voh rukhsaar, voh hont
zindgi jin key tasavvur meN luTaa di ham ney
tujh pey uThi haiN voh kho’ii kho’ii saahir aankheN
tujh ko ma’aluum hai kyoN umr ganvaa dii ham ney

ham pey mushtarik haiN ehsaan Gham-e-ulfat key
itney ehsaan keh ginvaauuN to ginvaa na sakuuN
ham ney is ishq meN kaya khoyaa hai kayaa siikhaa hai

juz terey aur ko samjhaauN to samjhaa na sakuN