Suraag dey ga kaheen ja k maah o saal men tu
Kahan rahey ga merey kooza e khayal men tu

Parayi dhoop sey aangan ki teergi achi
Ulajh raha hai yeh kis roshni k jaal men tu

Tujhey khaber nahin urti hai khaak e jaan kaisey
Ghira nahin kisi andeysha e zawal men tu

"Main dekhta hon lakeeron ki serhadon men tujhey
Likha hua hai merey dast e kamal men tu"

Tujhey main mang raha hoon yeh kis bahaney sey
Chupa hua hai meri khwahish e sawal men tu

Kisi ki aankh sey khwabon ki kirchiaan chun ker
Ab aik umer sey baitha hai kis malaal men tu

Kahan gaya terey ander ka khud parast Zafer
Bikher gaya hai kisi k jamal men tu