Tu Aks Hai To Kabhi Meri Chashm-e-Ter Men Utar...

Naya Hai Shehar, Naey Aasray Talaash Karoon
Tu Kho Gaya Hai, Kahan Ab Tujhay Talaash Karoon

Jo Dasht Men Bhi Jalatay Thay Fasal-e-Gul Kay Chiragh
Main Shehar Men Wohi Aablay Talaash Karoon??

Tu Aks Hai To Kabhi Meri Chashm-e-Ter Men Utar...!!
Teray Liay Kahan Main Aainay Talaash Karoon.........!!

Tujhay Hawaas Ki Awaargi Ka Ilam Kahan...!!
Kabhi Main Tujh Ko Teray Samnay Talaash Karoon..!!

Meray Wajood Sey Shayad Milay Suraagh Tera
Kabhi Main Khud Ko Teray Waastay Talaash Karoon

Ghazal Kahoon, Kabhi Saada Sey Khat Likhoon Us Ko
Udaas Dil Kay Liay Mashghalay Talaash Karoon...!!

Main Chup Rahoon Kabhi Be-Wajjah Hans Parroon MOHSIN
Usay Ganwa Kay Ajjab Hoslay Talaash Karoon.............. ..!!!!!!