zaKhm-e-tanhaaii men Khushbuu-e-hinaa kis kii thii

zaKhm-e-tanhaaii men Khushbuu-e-hinaa kis kii thii
saayaa diivaar pey meraa thaa sadaa kis kii thii

uskii raftaar sey lipaTii rahii merii aaNkhen
us ney muRR kar bhii na dekhaa keh vafaa kis kii thii

vaqt kii tarha dabay paaoN yeh kaun aayaa hai
main aNdheraa jisey samajhaa vo qabaa kis kii thii

aaNsuon sey hii sahii bhar gayaa daaman meraa
haath to main ney uThaaye they duaa kisakii thii

merii aahon kii zabaan koii samajhataa kaisey
zindagii itnii dukhii merey sivaa kis kii thii

aag sey dostii us kii thii jalaa ghar meraa
dii gaee kis ko sazaa aur Khataa kis kii thii

main ney biinaaiyaaN bo kar bhii andherey kaaTey
kis k bas men thii zamiin abr-o-havaa kis kii thii

chhor dii kis liye tuu ney "Muzaffar" duniyaa
justjuu sii tujhey har vaqt bataa kisakii thii