Main Aaina tha, woh maira khayal rakhti thi
Main toot-ta tha to chun kar sambhal rakhti thi

Har aik maslay ka hal nikal rakhti thi
Zaheen thi, mujhay hairat mEn daal rakhti thi

Main jab bhi tark-e-taluq ki baat karta tha
Woh rokti thi mujhay, kal pay taal rakhti thi

Bas aik woh thi jisay ghaao main dikhata tha
Bas aik woh thi keh jo andmal rakhti thi

Woh mairay dard ko chunnti thi apni poron say
Woh mairay wastay khud ko nidhal rakhti thi

Woh doobnay nahi daiti thi dukh kay darya men
Mairay wajood ki naao uchaal rakhti thi

Duayen us ki balaaon ko rok laiti thin
Woh mairay chaar soo haathon ki dhaal rakhti thi

Ik aisi dhun keh nahi phir kabhi main nay suni
Woh munfarid sa hansi men kamaal rakhti thi

Usay nadamtain meri kahan gawara thin
Woh mairay wastay asaan sawal rakhti thi

Bichar kay uss say main duniya ki thokaron menn hoon
Woh pass thi to mujhay lazwaal rakthi thi