مرے ہمسفر ! تری نذر ہیں مری عمر بھر کی یہ دولتیں

مرے ہمسفر ! تری نذر ہیں مری عمر بھر کی یہ دولتیں
مرے شعر ، میری صداقتیں ، مری دھڑکنیں ، مری چاہتیں

تجھے جذب کرلوں لہو میں میں کہ فراق کا نہ رہے خطر
تری دھڑکنوں میں اتار دوں میں یہ خواب خواب رفاقتیں

یہ ردائے جاں تجھے سونپ دوں کہ نہ دھوپ تجھ کو کڑی لگے
تجھے دکھ نہ دیں مرے جیتے جی سرِ دشت غم کی تمازتیں

مری صبح تیری صدا سے ہو ، مری شام تیری ضیا سے ہو
یہی طرز پرسشِ دل رکھیں تری خوشبوں کی سفارتیں

کوئی ایسی بزم بہار ہو میں جہاں یقین دلا سکوں
کہ ترا ہی نام ہے فصلِ گل ، کہ تجھی سے ہیں یہ کرامتیں

ترا قرض ہیں مرے روز و شب ، مرے پاس اپنا تو کچھ نہیں
مری روح ، میری متاعِ فن ، مرے سانس تیری امانتیں

اعتبار ساجد


Merey hamsafar teri nazar hain meri umr bhar ki yeh dolatain
merey shair meri sadaqatain meri dharkanain meri chahatain

tujhay jazb kar loon lahu men main keh firaaq ka na rahey khatar
teri dharkanon men utaar doon main yeh khawab khawab rifaqatain

yeh ridaye jaan tujhay sonp doon keh na dhoop tujhko karri lagey
tujhay dukh na dain merey jeetey ji sar e dasht gham ki tamazatain

meri subah teri sada sey ho meri shaam teri zia sey ho
yehi tarz e pursish e dil rakhain teri khushbuon ki sifaratain

koi aisi bazm e bahaar ho main jahan yaqeen dila sakoon
keh tera hi naam hai fasl e gul keh tujhi sey hain yeh karamatain

tera qarz hain merey roz o shab merye paas apna to kuch nahin
meri rooh meri mata e fan meri saans teri amanatain