apni tanhayee merey naam pey abaad karey
kaun hoga jo mujhey us ki tarah yaad karey
dil ajab shehar keh jis per bhi khula dar is ka
wo musaafir isey har simt sey barbaad karey
apney qaatil ki zahaanat sey pareshaan hoon main
roz aik maut naye tarz ki aijaad karey
itna hairaan ho meri be talabi k aagey
wa qafas men koi dar khud mera saiyad karey
salb binaaii k aihkaam miley hain jo kabhi
roshni chhooney ki khawahish koi shab zad karey
soch rakhna bhi jaraiyem men hai shamil ab to
wahi masoom hai har baat pey jo saad karey
jab lahoo bol parrey us k gawahoon k khilaaf
qazi e shahar kuch is baab men irshaad karey
us ki muthi mein bohot roz raha mera wajood
merey saahir sey kaho ab mujhey aazad karey
No comments:
Post a Comment