aaNkhoN ka raNg, baat ka lehja badal gayaa

aaNkhoN ka raNg, baat ka lehja badal gayaa
vo shaKhs ek shaam meN kitnaa badal gayaa


kuch din to mera aks raha aaiiney pey naqsh
phir yuuN huaa, keh khud meraa chehraa badal gayaa


jab apney apney haal pey hum tum na reh sakey
to kayaa huaa jo ham sey zamanah badal gayaa


qadmoN talay jo rait bichhi thii vo chal paRii
us ney chhuRaya haath to sehra badal gayaa


koyii bhi chiiz apni jagah par nahiN rahii
jaatey hii ek shaKhs k, kayaa kayaa badal gayaa


ik sarKhushi ki mauj ney kaisa kiyaa kamaal
wo bay-nayaaz saaraa ka saaraa badal gayaa


uTh kar chalaa gayaa koii waqfey k darmiyaaN
pardaa uThaa to saara tamashaa badal gayaa


hairat sey saarey lafz usey dekhtey rahey
baatoN meN apni baat ko kaisaa badal gayaa


kehney ko ik sehan meN diivaar hii bani
 ghar ki fizaa makaan ka naqsha badal gayaa


shaayad vafa kay khel sey uktaa gayaa tha vo
manzil kay paas aa kay jo rasta badal gayaa


qaayem kisii bhi haal pay duniya nahiN rahi
 ta’biir kho gayii kabhi sapnaa badal gayaa


manzar ka rang asal meN saaya tha rang kaa
jis ney usey jidhar say bhi dekhaa, badal gayaa


andar k mausmoN ki khabar us ko ho gayi
 us nau-bahaar-e-naaz ka chehra badal gayaa


aankhoN meN jitney ashk they jugnuu sey ban gaye
vo muskuraaya aur merii duniyaa badal gayaa


apni galii meN apna hi ghar dhuuNDhtey haiN log
Amjad yeh kaun shehar ka naqsha badal gayaa!