jo utar k ziinaa-e-shaam sey terii chashm-e-Khush meN samaa gaye

jo utar k ziinaa-e-shaam sey terii chashm-e-Khush meN samaa gaye
vuhii jaltey bujhtey sey mehr-o-maah merrey baam-o-dar ko sajaa gaye

yeh jo aashiqui ka hai silsila, hai yeh aSal meN koi maujza
keh jo lafz merey gumaaN meN they, vo terri zubaaN pey aa gaye

vho jo giit tum ne sunaa nahiiN merii umr bhar kaa riyaaz thaa
merrey dard kii thii vo daastaaN jisey tum haNsii meN uRaa gaye

vo chiraagh-e-jaaN kabhii jis kii lau na kisii havaa sey niguuN huii
terii bevafaaii k vasvasey usey chupkey chupkey bujhaa gaye

voh thaa chaaNd shaam-e-visaal kaa keh thaa ruup terey jamaal kaa
merii ruuh sey merii aaNkh tak kisii raushnii meN nahaa gaye

yeh jo bandagaan-e-niyaaz haiN yeh tamaam haiN vahii lashkarii
jinheN zindagii ney amaaN na dii to terrey huzuur meN aa gaye

terii beruKhii k dayaar meN maiN havaa k saath havaa huaa
terrey aa’iiney kii talaash meN merey Khvaab chehraa gaNvaa gaye

terrey vasvasoN k fishaar meN, teraa shehar-e-rang ujaR gayaa
merii KhvaahishoN k ghubaar meN merrey maah-o-saal-e-vafaa gaye

vo ajiib phuul sey lafz they terrey hoNT jin sey mehak uThey
merey dasht-e-Khwaab meN duur tak koii baagh jaisey lagaa gaye

merii umr sey na simaT sakey merrey dil meN itney savaal they
terey paas jitney javaab they terii ik nigaah meN aa gaye