yuuN hai keh tujhey bhuul k dekheN gey kisii din

khud apney liye baiTh k socheN gey kisii din
yuuN hai keh tujhey bhuul k dekheN gey kisii din

bhaTkey huye phirtey haiN kaii lafz jo dil meN
duniya ney diya waqt to likkheN gey kisii din

hil jaayeN gey ik baar to arshoN k dar-o-baam
yeh khaak nashiiN log jo boleN gey kisii din

aapas ki kisii baat ka miltaa hii nahiiN vaqt
har baar yeh kehtey haiN keh “baiTheN gey kisii din”!

ay jaan terii yaad k be-naam parindey
shaaKhoN pey merey dard kii utreN gey kisii din

jaatii hai kisii jhiil ki gehraii kahaaN tak
aaNkhoN meN terii Duub k dekheN gey kisii din

Khushbu sey bharii shaam meN jugnuu k qalam sey
ik nazm terey vaastey likkheN gey kisii din

soyeN gey terii aaNkh ki Khalwat meN kisii din
saaye meN terii zulf k jqageN gey kisii din

sehra-e-Kharaabii ki isii gard-e-safaa sey
phuuloN sey bharey raastey nikleN gey kisii din

Khushbuu ki tarah misl-e-sabaa khvaab numaa sey
galiyoN sey terey shehar kii guzreN gey kisii din 

Amjad hai yahii ab k kafan baaNdh k sar par
us shehar-e-sitamgaar meN jaayeN gey kisii din!