Jub tassavur mera chupkey sey tujhey choo aaye
Meri har saans sey mujhko teri khushboo aaye

Mashghala ab hai mera chaand ko taktay rehna
Raat bhar chain na mujhko kisi pehloo aaye

Jab kabhi gardish-i-dauraan ney sataya mujhko
Meri janib terey phailay huway baazoo aaye

Jab bhi socha keh shab-e-hijr na ho gi roshan
Mujhko samjhanay teri yaad k jugnoo aaye

Kithna hassaas meri aas ka sannata hai
Keh khamoshi bhi jahan baandh k ghungroo aaye

Mujhsey milney ko sar-e-shaam koyi saaya
Terey aangan sey chaley aur lab-e-ju aaye

Us k lehjey ka asar to hai barri baat Qateel!
Wo to aankhon sey bhi karta huwa jadoo aaye