kat hi gaii judai bhi kab yun hua keh mar gaye
terey bhi din guzar gaye merey bhi din guzar gaye
tu bhi kuch aur aur hai ham bhi kuch aur aur hain
jaaney wo tu kidhar gaya jaaney wo ham kidhar gaye
raahon men hi miley they ham raahen nasiib ban gaiin
tu bhi na apney ghar gaya ham bhi na apney ghar gaye
wo bhi ghubar-e-Khaak tha ham bhi ghubar-e-khaak they
wo bhi kahin bikhar gaya ham bhi kahin bikhar gaye
koi kinar-e-aab-e-ju baitha hua hai sarniguun
kashti kidhar chali gaii jaaney kidhar bhanwar gaye
terey liye chaley they ham terey liye thehar gaye
tu ney kaha to jii uthey tu ney kaha to mar gaye
waqt hi kuch judai ka itna taviil ho gaya
dil men terey firaaq k jitney they zaKhm bhar gaye
barish-e-vasl wo hui sara ghubar dhul gaya
wo bhi nikhar nikhar gaya ham bhi nikhar nikhar gaye
itney qarib ho gaye itney raqib ho gaye
wo bhi “Adeem” dar gaya ham bhi “Adeem” dar gaye
No comments:
Post a Comment