Abhi to ishq men aisa bhi haal hona hai,
Keh ashk rokna tum sey muhaal hona hai
Her aik lab pey hai meri wafa k afsaaney,
Terey sitam ko abhi la-zawaal hona hai,
Baja keh khaar hain, lekin bahaar ki rut men,
Yeh taey hai ab k humain bhi nihaal hona hai,
Tumhen khabar he nahi tum to lout jaao gey,
Tumhaarey hijr men ik lamha bhi saal hona hai,
Humari rooh pey jab bhi azaab utrey hain,
Tumhari yaad ko is dil ki dhaal hona hai,
Kabhi to roye ga wo bhi kisi ki baahon men,
Kabhi to us ki hansi ko zawaal hona hai,
Milen gi hum ko bhi apnee naseeb ki khushiyan,
Bus intezaar hai kab yeh kamaal hona hai,
Her shaqs chaley ga humari raahon per,
Mohabbaton men humen wo misaal hona hai,
Zamaana jis k gham-o-paich men ulajh jaaye,
Humaari zaat ko aisa sawaal hona hai,
Wasi yaqeen hai mujh ko wo lout aaye ga,
Usay bhi apney kiye ka malaal hona hai...!!!
No comments:
Post a Comment