Muhabbat jurm sar'zad ho gaya mujh sey,saza likh do,
Shareek e jurm lekin kis tarah sey bach gaya likh do
Mujhay is teergi men kuch sujhaayee hi nahi deyta,
Tum in palkon pay koi timtimata sa diya likh do
Zuban ko izn e junbash hi nahi,rokoon tumhein kaisay?
meri aankhon men koi bheegti si ilteja likh do
Nasaab e dil men tum ney yuun tou sab kuch likh dia lekin,
Jigar sey roshnayee lay k ab is men wafa likh do
Tumhari aankh men apna muqadar parrh liya mein ney,
Issay meri jabeen par bhi,tum aa kar ab zara likh do
Yeh phailay tou zameen o aasmaan ki wusat'ein kum hain,
Samaito aik nuktay men tou dil ko KARBALA likh do
Khuda bhi rad karay tou aik lamhay kay liye sochay,
Batool,apnay labon par tum,koi aysi dua likh do
No comments:
Post a Comment