Aik Udaas Nazm

December ki ghanni raatoN meN
jab baadal barastay hein
larazti Khaamshi
jab baal kholey
corridoroN meN sisakti hai
to aatishdaan k aagey
kaheeN sey vo dab'ay paa'oN
merey pehloo meN aati hai
aur apney marmareeN haathoN sey
sargoshioN meN
dard k qissey sunaati hai


July ki dopehreN
mamTiyoN se jab utar kar
aanganoN meN phail jaaty haiN
to ik aavaara sannaaTaa
chhattoN par bhaari qadmoN sey
baRRi aahistagi k saath chaltaa hai
to vo chupkey sey
merey paas aati hai
aur apney dheemey lehjey meN
vo saari daastaaneN
keh sunaati hai
jinheN sun kar
maiN dheemy aanch par
pehroN sulagtaa hooN


kisi girjay k veeraaN lawn meN
jab January
apney sunehrey gaisuu'oN ko khol kar
koi puraanaa geet gaati hai
to vo ik an-chhuuii "nun" ki tarah
patthar ki choki par
merey chehrey pey apni ungliyoN sey sog likhti hai


kisi vaadi k tanhaa Daak-bangley meN
kabhi jab shaam roti hai
siyah "coffee" k piyaaloN sey
lapakti bhaap meN
baatoN k "biscuit" phool jaatey haiN
to vo bhi janglee bailoN sey
uTh'ti Khushbu'oN sey
jism paati hai
meri saansoN ki pagDanDee pey
dheerey dheerey chalti hai
merey andar utarti hai!