Ussey kehna, keh saaton rang ley kar aa raha hoon mein

Ussey kehna, muhabbat khud hawa ko ba'khabar rakhey
ussey kehna, koi khushboo ko kab tak baandh kar rakhey

ussey kehna, keh saaton rang ley kar aa raha hoon mein
ussey kehna, keh mitti goondh kar woh taaq par rakhey

ussey kehna, kiran jaisa koi paighaam aaye ga
ussey kehna, keh deewar_e_ana men aik dar rakhey

ussey kehna, keh aansoo aankh men hain zeher ki soorat
ussey kehna, keh muddat ho gaii kaandhey pey sar rakhey

ussey kehna, keh har ik shaam koi laut aata hai
ussey kahna, kabhi tau phool wo dehleez par rakhey

ussey kehna keh deemak aur guzarta waqt ik jaisa
ussey kehna koi rumaal kab tak seent kar rakhey?

ussey kehna keh qayyum taahir thak gaya hoon mein
ussey kehna paron men merey apna aik par rakhey