Mujhey mila to girift-e-shabb-e-malaal mai tha

Na baab-e-harf-o-sada mai, na maah-o-saal mai tha
jawaab jiss ka nahi tha, woh uss sawaal mai tha

main zindagi ki tarah uss ki baat baat mai thi
woh roshni ki tarah, meray khad-o-khaal mai tha

yeh harf harf mai khusbu, yeh roshni ka hunar
mera to kuch bhi nahi, sab teray jamaal mai tha

jo muskura kay judai ki baat karta tha
mujhey mila to girift-e-shabb-e-malaal mai tha

yeh log yun to nahi thay jo ab zawaal mai hain
yeh shehar aisa nahi tha keh jab kamaal mai tha

keh manzaron mai jo manzar thay woh khulay mujh par
yehi hunar to meri wus’at-e-khayaal mai tha

andhairi raat mai jaisay chiraagh jal utthain
yeh kaya tilism teray ism-e-baymisaal mai tha