Us raah pey jaaney sey pehlay asbaab sanbhaal k rakh lena

Us raah pey jaaney sey pehlay asbaab sanbhaal k rakh lena

Kuchh ashk firaaq sey ley lena kuchh phool visaal k rakh lena

Ek umr ki mehroomi apney seeney meN chhupaana mushkil hai

Jab hadd E wazaahahat aa jaaye, yeh teer nikaal k rakh lena

Ek hairat dil meN jhaNkey gi, aaNkhoN meN sitaarey TaaNkey gi

Jo aaNsoo tum par bhaari hoN daaman men uchhaal k rakh lena

Ek aisi chup  taari  karnaa jaisey  goyaaee sey aari ho

Khaamoshi k gehwaarey men aawaazeN paal k rakh lena

Chehrey sey khushi saabit karna jaisey har dukh sey ghaafil ho

HaaN baab E takhatub aaye to alfaaz malaal k rakh lena

Woh shaam bohat jald aaye gi jo tum ko tum sey milaaye gi

Us shaam tum apni aahoN sey kuchh naGhmey dhaal k rakh lena

Is kaar E jahaaN ki wehshat par jab koi dastaawez likho

Sab sey aakhir meN kuchh safhey apney ehwaal k rakh lena

Taa’eed k sannatey sey uTho, tardeed k shor meN aa jaao

Ek talkh jawaab sey behtar hai ilzaam sawaal k rakh lena

Ye khawaboN, zakhmoN, daaGhoN ki tarteeb munaasib hai lekin

Is zaad E safar meN ‘Azm’ kahiN kuchh sadmey haal k rakh lena