تسلی دے کے مرا صبر آزمانا مت
میں وضع دارستم ہوں مجھے رلانا مت
میں سوچ ہی نہیں سکتا کسی کے بارے میں
مری شکست کا باعث مجھے بتانا مت
اب اور ٹوٹنے کاحوصلہ نہیں مجھ میں
جمال یار مجھے آئینہ بنانا مت
ہم اہل عشق پلٹنا محال کر دیں گے
ہمارے ساتھ کہیں دو قدم بھی جانا مت
ترے حساب سے ہم حیرتی ہی اچھے تھے
کہا نہ تھا کہ ہماری سمجھ میں آنا مت
اسی زمین پہ رہنا پسند ہے ہم کو
ہمارے پر بھی نکل آئیں تو اڑانا مت
No comments:
Post a Comment