Ru Baru Woh Hay Ibaadat Kar Raha Hoon
Us K Chehray Ki Tilawat Kar Raha Hoon
Lo Khareedo Ek Nazar K Moal Mujhko
Apni Qeemat Men Ria’yat Kar Raha Hoon
Li Hay Zabt Nay Mujh Say Ijazat
Apnay Mehmaanon Ko Rukhsat Kar Raha Hoon
Chhin Gya Mulk-e-Jawani Bhi To Kya Gham
Ab Bhi Yaadon Par Hakoomat Kar Raha Hoon
Koi Bhi Gham Usko lotaya Nahi Hay
Youn Amaanat Men Khyanat Kar Raha Hoon
Us Nay To Bas Ek Zara Si Baat Chhairri
Main Wazahat Par Wazahat Kar Raha Hoon
Ishq Kar K Aap Bhi Ban Jaayen Insaan
Shaikh Ko Naseehat Kar Raha Hoon
Aashiqui Tofaan-e-Giryah Chaahti Hay
Aur Main Aahon Par Qana'at Kar Raha Hoon
Aasmaan Jo Shakhs Hay Sab Ki Nazron Men
Usko Choo Lainay Ki Jurrat Kar Raha Hoon
Main Nay Daikha Hay Qateel Uska Saraapa
Main Kahan Zikr-e-Qayamat Kar Raha Hoon
No comments:
Post a Comment