haaye logoN kii karam-farmaaiyaaN
tohmateN, badnaamiyaaN, rusvaaiyaaN
zindagii shaayed isii kaa naam hai
duuriyaaN, majbuuriyaaN, tanhaaiyaaN
kyaa zamaaneY meN yuuN hii kaT'tii hai raat
karvateN, betaabiyaaN, angRaaiyaaN
kyaa yahii hotii hai shaam-e-intizaar
aahaTeN, ghabraahaTeN, parchhaiyaaN
aik paikar meN simaT kar rEh gayiiN
KhuubiyaaN, zebaaiyaaN, raanaaiyaaN
zaKhm dil k phir harey karney lagiiN
badliyaaN, barkhaa ruteN, purvaaiyaaN
“Kaif” paida kar samandar kii tarah
vus’ateN, KhaamoshiyaaN, gehraaiyaaN
No comments:
Post a Comment