Naye bars ka pehla lamha

Meary mehboob
Naye bars ka pehla lamha dil aangan men utar raha hai
Meray haath men guzray bars ki kuch yaaden thammi hain...
Aur in yaadon men meray achay buray kaee pal hain
Aur in lamhon men...
Meray an'gint weham jo dharkan ki suurat dharak rahay hain
Meray an'gint andeshay jo yahaan wahaan bikhray huye hain
Shab kay teesray pehar maangi hui be'shumaar duaayen hain
Meri be'shumaar umeedain jo dilaasa ban kar saath rahi hain
Aur..aur...
Meri dhair saari tammanaayen jo be'qaraar karti rahi hain
In sab say jurra aik naam hai
Woh naam tumhara hai
Jo mera sahaara hai
Suno
Meray mehboob
Mein nay
Guzray bars ko woh saaray guzray pal waapis kar diye hain
Bas un say jurra tumhara naam paas rakh liya hai
Yeh soch kar dua kay pallu say baand liya hai
Keh
Hum naye bars guzray bars say achi yaaden banaayen gay