US KA AIHSAAS E LATIF AUR SHIKAST E ARMAAN

ruuH bechain hai, ik dil kii aziiyat kia hai
dil hii sho’laa hai to ye soz-e-moHabbat kia hai vo mujhe bhuul gaii, iskii shikaayat kia hai
ranj to ye hai k ro-ro ke bhulaayaa hogaa

vo kahaaN aur kahaaN Khaahish-e-Gham, sozish-e-jaaN us kii rangiin nazar aur nuquush-e-HirmaaN
us kaa aiHsaas-e-latiif aur shikast-e-armaaN
taana_zan ek zamaana nazar aayaa hogaa

jhuk gaii hogii javaaN-saal umangoN kii jabiiN
miT gaii hogii lahek, Duub gayaa hogaa yaqiiN
chhaa gayaa hogaa dhuaaN, ghuum gaii hogii zamiiN
apne pahle hii gharaunde ko jo Dhaayaa hogaa

dil ne aise bhii kuchh afsaane sunaaye hoNge
ashk aaNkhoN ne piye aur na bahaaye hoNge
band kamre meN jo Khat mere jalaaye hoNge
ek-ik Harf jabiiN par ubhar aayaa hogaa

us ne ghabraa ke nazar laakh bachaaii hogii
miTke ik naqsh ne sau shakl dikhaaii hogii
maiz se jab merii tasviir haTaaii hogii
har taraf mujhko taRaptaa huaa paayaa hogaa

be_mahel chhaiR pe jazbaat ubal aaye hoNge
Gham pashemaan tabassum meN Dhal aaye hoNge
naam par mere jab aaNsuu nikal aaye hoNge
sar na kaaNdhe se sahelii ke uThaayaa hogaa


zulf zid kar ke kisii ne jo banaaii hogii
ruuThe jalvoN pe KhizaaN aur bhii chhaaii hogii
barq ashkoN ne kaii din na giraaii hogii
rang chehre pe kaii roz na aayaa hogaa

ho ke majbuur mujhe us ne bhulaayaa hogaa
zahr chupke se davaa jaan ke Khaayaa hogaa