wo mujhey apney rangoN meiN rangta jaa raha hey

Tum sey mujhey ishq ka daawa to nahi hey


lekin dil key mosamoN ko jaanta hooN meiN


ehsaas meiN ye tughyaani pehley kabhi na thi


jazbaat meiN ye jawaani pehley kabhi na thi


pehley mery qadam kabhi behkey huwey na they


jaagti aaNkhoN key khaab mehkey huwey na they


Koi hey jo mery khaaboN meiN samaata ja raha hey


meri taareek raahoN meiN sawerey ugaa raha hey


na-mehram sey ik hamdam tak, sab pardey chattakh rahey heiN


sadyoN pey phailay faaslay aesy simatt rahey heiN


key mehfil meiN rahuuN to mehfil ka lehaaz nahi rehta


tanhaai meiN mujhey tanhaai ka ehsaas nahi rehta


AankhoN meiN kehkashaaN si jo soorat ubhar rahi hey


haathoN meiN us key naam ki lakeer ban rahi hey


wo mujhey apney rangoN meiN rangta jaa raha hey


aur mery dil ka har mosam badalta jaa raha hey


yehi hey agar ishq to mujhy honey laga hey yeh


tum hi ho wo shakhs to kyuN boltey nahi!