Dil k aatishdan main shab bhar

Dil k aatishdan main shab bhar
Kaisay kaisay gham jaltay hain!!!


Neend bhara sanata jis dam
Basti ki ik ik gali main
Khirki khirki tham jata hai


Dewaron per dard ka kohra jam jata hai
Rasta taknay wali aankhen or qindeelen bujh jati hain


To us lamhay,
Tery yaad ka eendhan ban kar
Shola shola hum jaltay hain
Doori k mosam jaltay hain


Tum kya jano,
Qatra qatra dil main utarti or pighalti
Raat ki sohbat kya hoti hai!


Aankhen saray khawab bujha den
Chehray apnay naqsh ganwa den
Or aainay aks bhula den
Aisay main umeed ki wehshat
Dard ki sorat kya hoti hai


Aisi tez hawa main piyaray,
Barray barray muunh zor diye bhi kam jaltay hain


Dil k aatishdan main shab bhar
Teri yaad ka eendhan ban kar
Hum jaltay hain ...........!!!