Koi mousam ho dil main hai tumhaari yaad ka mousam

Koi mousam ho dil main hai tumhaari yaad ka mousam
keh badla hee nahi janaan, tumharay baad ka mousam

Nahi to aazma kay daikh lo kaisay badalta hai
tumharay muskuranay say dil-e nashaad ka mousam

Sadaa taishay say jo nikli, dil-e Shireen say uthi thi
chaman Khusru ka tha laikin raha Ferhaad ka mousam

Parindon ki zubaan badli kahin say dhuund lay tu bhi
naee tarz-e fighan ay dil keh hai ijad ka mousam

Ruton ka qaayida hai waqt per yeh aati jati hain
hamaray shehar main kyun ruk gaya faryaad ka mousam

Kahin say us haseen awaz ki khushbu pukaray gi
to us kay saath badlay ga dil-e berbaad ka mousam

Qafas kay baam-o dar main roshni si aayi jati hai
chaman main aagaya shayad lab-e azaad ka mousam

Na koi gham khizan ka hai, na khuahish hai bahaaron ki
hamary saath hai Amjad kisi ki yaad ka mousam...!!!