sitam main kaun karay ga muqabla uska

sitam main kaun karay ga muqabla uska
keh zakhm bharta nahee'n hai dia huwa uska

usool par wo muhabbat ko waar baithha tha
alag tha saarey jaha'n sey muaamla uska

mujhey hai moja e toofa'n ka darr usey kyu'n ho
safina uska, bhanwar uska, Na Khuda uska

andheri shab jisey sotay main chhorh aaya tha
main dinn chharhay karoo'n kiss tarha saamna uska

wo rubaroo merey anjaan ban gaya kaisa
main dekh dekh kay hairaa'n hoo'n, hausla uska

jo tujh pay apni wafayen luta gaya chup chap
kabhi khayal bhi aaya, ay be wafa uska

"yeh raah chhorh chuka hoo'n" wo jhoot kehta tha
abhi bhi raah pay taaza hai naqsh e paa uska