Khud ko paRhtaa huuN, chhoR detaa huuN
ek varq roz moR detaa huuN
is qadar zaKhm haiN nigaahon meN
roz ek aaiinaa toR detaa huuN
maiN pujaarii barastey phuuloN ka
chuu k shaaKhoN ko chhoR detaa huuN
kaasa-e-shab meN Khuun suuraj kaa
qatraa qatraa nichoR detaa huuN
kaaNptey hoNT bhiigtii palkeN
baat adhuurii hii chhoR detaa huuN
ret k ghar banaa banaa k “Fraz”
jaaney kyuuN Khud hii toR detaa huuN
No comments:
Post a Comment