Is rishta-e-latif k israar kaya khulen?

Andaaz hu-bahu teri aawaz-e-paa ka tha
Dekha nikal k ghar sey to jhonka hawa ka tha

Utha ajab tazaad sey insan ka khameer
Aadi fana ka tha to pujaari baqa ka tha

Is rishta-e-latif k israar kaya khulen?
Tu saamney tha or tasawwur Khuda ka tha

Toota to kitney aaina-khanon pey zad parri
Atka hua galey men jo pathar sada ka tha

Chup chup k ro'oun or sar-e-anjuman hansun
Mujh ko yeh mashwra merey dard-aashna ka tha

Dil raakh ho chuka to chamak or barh gayi
Yeh teri yaad thi keh amal kemiya ka tha

Is husun-e-ittefaq pey lut kar bhi shaad huun
Teri raza jo thi woh taqaza wafa ka tha

Hairaan hun keh daar sey kesey bacha Nadeem?
Wo shakhs to ghareeb-o-ghayoor inteha ka tha

Ahmad Nadeem Qasmi