Kaya yeh mumkin keh ho jaaun terey qadmon ki khaak

Koi hull aisa keh jis sey masla qaayam rahey
Khatam ho jaaye udaasi or fiza qaayam rahey

Dost ki ungli pakarr kar main pohanch hi jaaun ga
Qibla-e-aalam tera qibla-numa qaayam rahey

Is liye bhi chahta huun khair terey husun ki
Dost! teri shakal men shaan-e-Khuda qaayam rahey

Kaya tera ho kar yeh mumkin hai nigah-e-neem-baaz
Is jahan ko dekhney ka zaaviya qaayam rahey

Ye jo mitti ki terha hum ko bitha deta hai tu
Mosam-e-giriya! tera yeh silsila qaayam rahey

Kaya yeh mumkin keh ho jaaun terey qadmon ki khaak
Or dunya k liye meri anaa qaayam rahey

Ye mujhey tasleem mujh ko shayari aati nahi
Jo bharam sa ban gaya hai, Ay Khuda qaayam rahay