ujaar na jaaey kahin dil, makeen kay aanay tak

tu mubtala e gham e hijr! dil sanbhaal abhi
keh raastay men hai ik mausom e wisaal abhi


jabeen pay lau hai,salaamat hain khad o khaal abhi
dil e tabaah! kisi weham men na daal abhi


kahan aseer e zamana hua bhala woh shakhs
usay hai meri tal'ab aur mera khayaal abhi


baseet e dard say aagay,muheet e ranj kay paar
basa hua hai koi shehar e khush jamaal abhi


abhi jawaab dahi zauq e khusarwi men nhi
yeh log lab pay na laayen koi sawaal abhi


ajab nhi keh yeh basti bhi dasht men badlay
keh rum'zad'aa hai koi suurat e ghazaal abhi


ujaar na jaaey kahin dil, makeen kay aanay tak
hamin ko karni hai is ghar ki daikh bhaal abhi


palat kay dekh to ay akhtar e ghinwa e shubha
keh shab kay saath parra hai koi nidhaal abhi