mushkil hai ab shehar men nikley koii ghar sey
dastaar pey baat aa gaii hai hotii huii sar sey
barsaa bhii to kis dasht k be-faiz badan par
ik umr merey khait they jis abr ko tarsey
is baar jo iindhan k liye kaTT k giraa hai
chiRRiyon ko baRRaa pyaar thaa us buuRRhey shajar sey
mehnat merii aaNdhii sey to manasuub nahiin thii
rehnaa thaa koii rabt shajar kaa bhii samar sey
Khud apney sey milney kaa to yaaraa na thaa mujh men
main bhiiRR men gum ho gaii tanhaaii k Dar sey
be'naam musaafat hii muqaddar hai to kayaa Gham
manzil kaa ta'ayyun kabhii hotaa hai safar sey
pattharaayaa hai dil yuuN keh koii ism paRhaa jaaye
yeh shehar nikaltaa nahiin jaaduu k asar sey
nikley hain to rastey men kahiin shaam bhii ho gii
suuraj bhii magar aaye gaa is raah-guzar sey
No comments:
Post a Comment