کیا خبر کون زوالِ شبِ ہجراں دیکھے؟

بے کراں رات میں تُو انجمن آرا ہے کہ ہم
اے زمیں تُو اس اندھیرے کا ستارہ ہے کہ ہم

اُس نے پوچھا تھا کہ سر بیچنے والا ہے کوئی
ہم نے سر نامۂ جاں نذر گزارا ہے کہ ہم

کیا خبر کون زوالِ شبِ ہجراں دیکھے؟
یاں چراغِ شبِ ہجراں کا اشارہ ہے کہ ہم

تُو اِدھر کس کو ڈبونے کے لئے آئی تھی
دیکھ اے موجِ بلا خیز کنارہ ہے کہ ہم

آج تک معرکۂ صبر و ستم جاری ہے
کون جانے یہ تماشا اسے پیارا ہے کہ ہم