ایسی سُونی تو کبھی شام ِغریباں بھی نہ تھی

غم ِدوراں نے بھی سیکھے غم ِجاناں کے چلن
وہی سوچی ہوئی چالیں وہی بے ساختہ پن

وہی اقرار میں انکار کے لاکھوں پہلو
وہی ہونٹوں پہ تبسّم وہی آبرو پہ شکن

کس کو دیکھا ہے کہ پندار ِنظر کے با وصف
ایک لمحے کے لئے رک گئی دل کی دھڑکن

کون سی فصل میں اس بار ملے ہیں تجھ سے
ہم کو پرواہِ گریباں ہے نہ فکر ِدامن

اب تو چبھتی ہے ہوا برف کے میدانوں کی
ان دنوں جسم کے احساس سے جلتا تھا بدن

ایسی سُونی تو کبھی شام ِغریباں بھی نہ تھی
دل بجھے جاتے ہیں اے تیرگیٔ ِصبح ِوطن