Taar-e-rag-e-hayaat jo larzaan hai aaj kal
Saaz-e-wafa pey koi ghazal khwaan hai aaj kal
Markaz bana hua hoon kisi ki nigaah ka
Mujh par gham-e-hayaat bhi aasaan hai aaj kal
Phir hain junoon nawaaz nigahon ki shokhiyan
Maa’il ba’naaz deeda-e-janaan hai aaj kal
Daanista phir kisi ki tawajjo hai is taraf
Barbadiyon ka phir koi samaan hai aaj kal
Tajdeed-e-wada haa-e-wafa chaahata hoon main
Phir shamma-e-ishq dil men farozaan hai aaj kal
Wo meri kaiynaat-e-mohabbat sey kaya gaye
Duniyaa-e-aarzu meri weeraan hai aaj kal
kisi sey phir hai umeed-e-wafa mujhey
Phir aarzu-e-khawab pareshaan hai aaj kal
No comments:
Post a Comment