Wo khayal tha koi dhanak-numa ya koi aks tha merey ru’baru

Wo khayal tha koi dhanak-numa ya koi aks tha merey ru’baru
jo mujhey har taraf sey tuu laga wo tuu hi tha ya koi hu-bahu!

bayaaN meiN thi wo chaashni keh mehak raha tha harf harf
jesey khushbuoN ki zubaan meiN koi kar raha ho guftagu

nahi kuch khabar keh kis gharri terey raastoN ka sira miley
terey naqsh-e-pa ki talaash meiN lagi to hey meri justuju

bas deikhna hey kis tarha wo ji raha hey merey baghair
yuN to dil meiN hey wo aaj bhi jisey dhooNdta hooN ku-ba-ku

yeh yaad tha keh dua karooN par utthey rahey merey haath yuN
jesey khaahishoN kay hajoom meiN kaheeN kho gai teri aarzu