mere junuun-e-parastish se tang aa gaye laug

sunaa karo merii jaan, in se, un se afsaane
sab ajnabii hain yahaan, kaun kis ko pehchaane


yahaan se jald guzar jao qaafile waalo
hain merii pyaas ke phuunke hue ye wiiraane


mere junuun-e-parastish se tang aa gaye laug
sunaa hai band kiye jaa rahe hain but-khaane


jahaan se pichhale peher koii tashnaa-kaam uthaa
wahiin pe torre hain yaaroon ne aaj paimaane


bahaar aaye toh mera salaam keh dena
mujhe to aaj talab kar liyaa hai sehraa ne


suna hai huqm ke "Kaifi" ko sang-saar karo
masiihaa baithe hain chhup ke kahaan, khuda jaane