tum abr-e-gurezaN ho
men sehra ki maanind hon
do boond jo barso gay
bekaar men barso gay

hai khushk bohat mitti
har simt bagolay hen
sehra kay bagolon say
uth’tay hi to sholay hen
tum khul kay agar barso
sehra men gulistaN ho
par tum se kahen kaisay
tum abr-e-gurezaN ho

jal thal jo agar kar do
tan-man men nami bhar do
hai khushk bohot mitti
poori jo kami kar do
mil jao agar hum ko
hum jashn manaein gay
dharti ne na dekhay hon
wo phool khilaein gay
aankhon men ujaalay hon
or dil mein chiraaghaN ho

par tum se kahen kaisay
tum abr-e-gurezaN ho