merii jaan soch lenaa keh yeh raastay kaRRay haiN

Yeh ajeeb marhalay haiN, Yeh ajeeb silsilay haiN
keh jahaaN say hum chalay thay, ussi moR pay khaRRay haiN

Wuhii raasta humaraa, hay wuhii daGar humaari
jo na jaaey manziloN tak yeh wuhii tou raastay haiN

rahay saath saath har pal na gumaaN huwaa yeh mil kar
jissey dostii thay kehtay woh kuch aur sisliay haiN

yeh saraab tou nahiN hay koii khawaab tou nahiN hay
zaraa aap hii bataaiN yeh jo hum meiN faasilay haiN

nahiN mumkin uss ko paana tou phir uss say kyuN milaiN hum
karaiN justuju bhii kyuN hum issi soch meiN paRRay haiN

teray naam zindgaani, hay yehii meri kahaani
merii zindagii meiN roshan terii yaad kay diye haiN

merii qurbatoN say pehlay, zara juratoN say pehlay
merii jaan soch lenaa keh yeh raastay kaRRay haiN